Adad chaar ( 4 ) waloo k naam ki khususiyat

Apne Naam Ka Adad Jaan-nay Kay Liye Yahan Click Karein

     Adad 4 ka Mukhtasir Taaruf  

Adad 4 Hamesha teen adaad ka mufrad ho ga jaisay 13, 22, aur 31. woh log jo kisi bhi Mahine ki is tareekh ko peda hue hain woh bhi Adad 4 ke zair asar hon ge .

 

     Aap Ki Khoobiyan o Khamiyan

Aap zindagi mein nazm o zabt par amal karne walay hain.
Aap sanjeeda soch ke maalik hain.
Aap kay mizaaj mein aman pasandi payi jati hai.
Aap karobari zehen rakhney waley hain.
Aap ko falsafah mein kafi interest hoga
Aap mehman Nawaz hongay .
Karobari soch rakhney ki wajah se aap aksar auqaat apne doston aur Rishte daaron mein woh izzat o muqam haasil nahi kar paate jis ki aap ko umeed hoti hai.
Aap basa auqaat apne kaarobar ko apne doston par Tarjih dete hain jis ke sabab aap apne dost kho detay hain.
Aap apnay khayalat ka azadana izhaar karna pasand karte hain aur mumkin hai ke aap ke khayalat se aap ke dost Ittafaq nah kartay hon.
Aap Aala aur Dana shakhsiyat ke haamil hain.
Aap mein Ijaad o Takhleeq ki tamam Salahiyatein mojood hain.
Aap kisi had tak jald baz waqay huway hain.
Aap khush fehmi ki duniya mein rehna pasand karte hain.
Aap doosron ko mukhlisana Mashwara detay hain.
Aap mein Shohrat aur Husool e Doulat o Jaaidaad ki shadeed khuwahish payi jati hai.
Aap hassas tabiyat ke maalik hain.
Aap dosron ko takleef mein nahi dekh saktay .

     Shakhsiyat   

Aap aik Tahammul mizaaj aur achi shakhsiyat ke maalik hain.
Aap mein qudrat nay woh tamam salahiyatein peda kar rakhi hain jin ki badolat aap kisi bhi Idaaray ke sarbarah ya aik Nihayat he Ahem Rukan ban satkay hain.
Aap ki Shakhsiyat ka aik Ahem juzw kisi Usool ko apna lena hai .
Agar aap nay zindagi mein koi khaas usool apna liya to phir aap is ki wajah se barri se barri mushkil bhi seh janay ka hosla rakhnay kay qabil ho jaingay .
Aap ko muaashray mein behtar zindagi guzarnay ke liye doulat ki Ahmiyat ka Ehsas to hai lekin aap jama karnay ki bajaey kharch karna pasand kartay hain.
Aap un logon mein hain jin par qismat meharban rehti hai lekin is meharbani ke husool ke liye aap ko kuch jid-o-jehad karna parrti hai.
Aap ki zindagi mein shandaar Kamiyabiyan nah Semait saknay ki aik wajah aap ki zid aur Sust rawi hai.
Aap ki raye mein wazan hota hai aur agar aap siyasi maidan mein hon to opposition ka kirdaar bohat khoobi se ada karte hain jis se Hukmaran tabqa ko kaafi pareshani ka saamna rehta hai.
Aap ki zaat se doosray faida uthatay hain jabkay aap un se koi khatir khuwa faida nahi lay paatay.
Aap jahan apni pesha waranah salahiyaton ko bohat khoobi se ada karte hain wahein par aap mein yeh salahiyat nahi hoti ke aap doosron per kisi qisam ki rok laga sakein .

     Dili Muamlaat Aur Shadi 

Aap Mohabbat kay muamlaat main bohot ehtiyaat pasand waqay huway hain.
Aap pehli nazar mein muhabbat ke qaail nahi hain.
Khuda na Khuwasta agar aap ko mohabbat kay muamlay mein na kaami ka saamna ho jaye to phir aap zehen aur qalb ke amraaz mein Mubtila ho satkay hain.
Shadi ke liye bhi aap jald baazi se kaam nahi letay.
Agar kisi jagah se shadi ka pegham aye to kuch arsa khoob soch bichaar se kaam le kar faisla karte hain.
Aap aik aisa shareek e hayaat chahtay hain jo zindagi ke mushkil waqt mein bhi aap kay sath Hanstaa Muskorata rahay .

     Maal o Doulat 

Aap ko behtar zindagi basar karne ke liye doulat ki Ahmiyat ka ba-khoobi Ehsas hai.
Aap mushkil halaat kay liye doulat jama karne ke tareeqon se poori tarha waaqif  hain.
Aap ko aisi schemes ya sarmaya kari karna passand nahi jis main koi shart jari ho .
Aap ghar ki purani ashiya ko beech kar nai ashiya ki khareed pasand kartay hain .


     Sahet O Beemari 

Umoomi lehaz se aap aik behter sahet kay haamil hongay .
Aap ki tabiyat jab hejaan ka shikaar ho jati hai to yeh aap ko blood pressure, zehni be sukooni aur dil ke amraaz mein mubtila kar sakti hai.
Aap ko apni sahet behtar rakhnay ke liye koi nah koi Mashgala Apnaana hoga jo aap ke hejaan ko qaboo mein rakhay, is maqsad ke liye Arts ka shoba aap ke liye bohat Muawin saabit hoga .

     Adad 4 ki Mashhoor Shakhsiyaat

Adad 4 ki Haamil Mashhoor shaksiyaat mein dunya kay Ameer tareen aur Microsoft ke maalik Bill Gates , Noble inaam Yafta Marie Curie , American President George Washington , Bartanwi wazeer e azam Margaret Thatcher , American adakaar Arnold Schwarzenegger, Australian Adakaara Nicole Kidman , Bartanwi gulukar Paul_McCartney aur Oprah Winfrey shaamil hain .

     Aap kay Adad Say Mutabiqat Rakhnay Walay Asma-e-Ilaahi 

Agar aap ka Adad 4 murakkab hai Adad 13 ka , to phir aap ” یا شھیدُ ”  ka wird karein .
Agar aap ka Adad 4 murakkab Adad 22 ka hai to phir aap  “یا بارُ ”  ka wird karein
Agar aap ka Adad 4 murakkab hai Adad 31 ka. to phir aap “یا محصی”  ka wird apne mamool mein rakhein .

     Aap Ka Nagina

Halka neelay rang ka Neelam ya halkay neelay rang ka he aquamarine naami nagina aap kay liye sa’ad rahay ga.